Kultura

Ikastetxea osatzen duten eragileen sinesmen, balio, printzipio eta pentsatzeko moduek osatzen dute kultura, eta ikastetxean gertatzen denari zentzua ematen diote.

Nire eskolari begira, kultura definitzeko, ikastetxea orokorrean aztertu baino, irakasle desberdinen jarrerak ikusi behar direla uste dut.

Alde batetik, irakasle batzuek elkarlanera eta ikasleen ongizatera bideratzen zuten irakaskuntza. Hori dela eta, esan dezakegu hezkuntzan izan beharreko printzipio egokiak zituztela, gelako prozesuetan zentratzen zirela, eta ez emaitzetan. Adibidez, irakasle hauek ospakizunei eta umeek disfrutatzeari izugarrizko garrantzia ematen zioten. Beraz, ikasleak ziren haientzat klaseko ardatza eta horrek interesa pizten zuen. 

Bestetik, aipatutako usteak baztertzen zituzten irakasle asko ere egon dira. Horiek, ikasleen arazoak eta klaseko giro egokia alde batera uzten zuten. Esaterako, haiek ezarritakoaren kontra zerbait gertatzen bazen, ikasle hori zigortu eta saioarekin jarraitzen zuten. Beraz, nire ustez, zigortzeko ohitura hori emaitza onak izateko bide egokiena zela uste zuten, arazoa nondik zetorren aztertu eta konpontzen saiatu baino. Bestalde, ikasgaia etxerako lanak egitera eta azterketak gainditzera bideratzen zuten.

Horrez gain, ikastetxeari begira euskal kultura transmititzeko ahaleginak eskasak izan dira. Hala ere, horretan interesa zuten irakasle batzuk egon dira, euskara sustatzeko ekintzak antolatzen zituztenak eta hizkuntza mantentzeari garrantzia ematen ziotenak.