Egitura

Eskola oso txikia zenez, elementuen multzoa ez zen oso handia. Bi irakasleak eskolan irakaskuntza-ikaskuntza prozesuaren eragile eta gidariak izateaz gain, eskola ordutegitik kanpo hezkuntza ez formalaren barne aurki ditzakegun musika klaseak ematen zituzten, alegia, solfeo eta piano eskolak. Bizipenean agertzen denez, irakasleek idazten, irakurtzen, matematika, musika eta horrelako edukiak irakasteko erantzukizuna zeukaten, ikasleen garapen integrala lortu ahal izateko. Musikari dagokionez, ez zegoen beste kanpoko ekintzarik, irakasle batek musika irakastea baino ez.

Horrez gain, agerian egon ez arren, zuzendaritza talde batek dituen betebeharrak betetzen zituzten eta familiekiko harremana sustatzeaz arduratzen ziren. Hau da, eskolaren barne-egituraren arduradunak ziren eta beste erakundeekiko harremana mantentzen zuten. Modu honetan, ekintza instituzionala burutu zuten. Hau ondorioztatu ahal izateko, bizipena bere osotasunean izan dut kontuan, erakunde bat behar bezala funtzionatzeko betebehar batzuk dituelako, ekintza instituzionala betetzearena, besteak beste. Hots, eskola urteetan zehar funtzionatu zuenez, dekretu zein legeak jarraitzen zituela imajinatzen dut.

Familiekiko harremana behin eta berriro bizipenean ikusi dugu, jaiak antolatzeko edo egoera zailetan haurraren ongizateari lehentasuna emateko, adibidez. Familiek haurra eskolan matrikulatu ostean, bertaratzea eta ordutegia betetzeko funtzioa zeukaten. Horrez gain, ospakizunetarako materialak prestatzeko ardura zuten eta, egun horietan, bertan egoteko erantzukizuna. Ez zeuden beharturik baina familiako senideak izanik, orokorrean parte hartzen disfrutatzen zutela esango nuke. Nire aitak, besteen artean, argazkiak ateratzen zituen beti. Bestetik, arratsaldetan nire ama meriendarekin nire bila etortzen zen; eta asteazkenetan, bera etortzeaz gain, nire aitona-amonak etortzen ziren. Beraz, hezkuntza-eragile oso garrantzitsuak izan direla esango nuke, egunerokotasunean bete duten funtzioaz gain, eskolarekiko harremana eta gauzatzen zuten rolagatik.

Ikasleoi erreparatuz, eskolako arauak errespetatzeko funtzioa geneukan (amantala janztea, ordutegia errespetatzea, jarduerak egitea...), eginkizunak betetzeko (ariketak, ekintzak egitea...) edo elkarlana gauzatzeko (besteei laguntzea, elkarrekin aritzea..). Baina funtziorik garrantzitsuena ikastea zen, ikasteko prest egotea. Umeek berez jakin-mina izugarria dute, ondorioz, eredu egokia jasoz gero, aipatutako funtzioa betetzea ez da zaila. Nik ikasteko gogoa neukan eta gauza berriekin disfrutatzen nuen, orduan, nire ikaskuntza prozesua gauzatzen zihoan.