Ingurunea

Ikastetxeko inguruneari dagokionez, eskola barruan eragina duten testuinguruko faktoreei buruz ari gara, hala nola, kokapen geografikoa, familien maila sozioekonomikoa, kultura… Beraz, estrukturatik kanpo dauden arren, ikastetxearen antolakuntzan eragina duten elementuak dira.

Nire ikastetxeari begira, Luis Briñas Santutxuko Haur Hezkuntzako eskola publikoa, Bilboko hirian kokatuta dago, Santutxu auzoko Fika kalean hain zuzen ere. Eskola bitan banatzen da: alde batetik Haur Hezkuntzako eraikuntza eta bestetik Lehen Hezkuntza eta DBH-koa, Iturriaga kalean kokatuta dagoena, Basarrate plazan (bata bestetik 10 minututara).

Haur-eskolaren ingurune fisikoa hiriko aldirietan kokatuta dagoela esan dezakegu. Hala ere, esan beharra dago, auzoko biztanleria dentsitatea oso handia dela, bildutako azken datuen arabera, gutxi gora behera 40.000 biztanlerekin eta 80,68 hektareako azalerarekin. Beraz, beti izan gara ikasle asko gelan eta beti lagun berriak joan eta etorri dira klaseko ibilbideari begira.

Eskolaren inguruneari dagokionez, kale eta hiriko paisaiek inguratzen dute. Auzoak kale eta etorbide zabalak eta aldapatsuak dituen arren, hainbat arbola eta parke topa daitezke eskolatik hurbil. Beraz, irteerei begira adibidez, oso erraz izan dugu beti garraio eta bisitatzeko leku aproposak topatzea, eskolatik hurbil baitzeuden. Horrez gain, adibidez egun batean irakasleak klasea gelatik kanpo eman nahi bazuen, eskola ondoko plazara gindoazen han ekintzak egitera.

Auzoaren ingurune sozioekonomikoari dagokionez, bertako biztanleriaren egoera orokortuz, esan dezakegu familia gehienen maila ekonomikoa erdikoa dela, behe-mailako kasuak ere ikus ditzakegun arren.

Ingurune soziolinguistikoari dagokionez, historian zehar egon diren aldaketak kontuan hartu behar dira. Ikastetxeei erreparatuta, lehen klaseak gaztelaniaz egiten baziren ere, gaur egun euskara da hizkuntza nagusia. Luis Briñas-en kasuan, lehen A eredua soilik zegoen. Denboraz A eta B ereduak batera egon ziren. Apurka-apurka a eredua amaitu eta D eredua hasi zen gaur egunera arte. Orain, LH-n azken B taldea geratzen da, 6.mailan, beraz, datorren ikasturtetik aurrera eskola osoa D eredukoa izango da. Beste alde batetik, auzoko familia gehienek erabiltzen duten hizkuntza nagusia gaztelania da. Izan ere, auzoko immigrante eta ijito kopurua handia da eta haien ama-hizkuntza gaztelania da. Hala ere, ama-hizkuntza euskara duten ikasleak ere badaude, gutxi izan arren. Bestalde, badaude familia asko non gurasoetariko batek euskara maila baxu-erdikoa duen.